Saturday, May 27, 2006

حنان تاني صداع حرام

أخيرا أرتدت حنان ترك الحجاب بعد صداع لعدة سنوات
يا ألف نهار أبيض
دقي يا مزيكا
لكن يا فرحة ما تمت ، وحنان ستظل جاثمة على أنفسنا تمثل بالحجاب ، ولن تعتزل
لست ضد أن ترتدي حنان أو أي فتاة الحجاب باختيارها أو إرادتها الشخصية . ولكن ضد أن تمثل حنان أو أي ممثلة وهي تضع شرط التمثيل بغطاء الرأس . لأن هذا الشرط يحمل مغالطة مهنية إذ أن التمثيل في أبسط صوره هو تقمص وأداء لشخصيات مختلفة غير لصيقة بشخصية مؤدي أو مؤدية الدور .و أن التشكل والتغير في شكل الممثل يتغير بحسب طبيعة الدور وهوأحد مقتضيات المهنة ومقوماتها. فكيف تقبل الممثلة نفسها بهذا الوضع أو يقبل مخرج أو منتج ما أن تأتي ممثلة لتفرض دورها في الحياة وليس دورها في النص الدرامي .. وهذا من وجهة نظري يعبر عن تقصير مهني واضح يعكس بالطبع تخلف المجتمع وتراجعه
والمقصود بمقتضيات المهنة هي الأدوات والمقومات التي تؤهل للشخص ممارساتها . فليس مقبولا أن يرفض طبيب علاج مريض لأن لديه حساسية من منظر الدم !! وإذا أصاب لاعب الرماية مشكلة في الإبصار فأنه حتما سيسارع بالإعتزال!!ا
أتمنى أن كل فنانة لاتجد في نفسها أحد مقومات مهنة التمثيل "التشكل والتغير"أن تسارع باعتزال التمثيل والبحث عن عمل آخر تصلح ممارسته بغطاء الرأس . ولكن أتمنى أيضا ألا يكون هذا العمل هو ممارسة دور الداعية لأنهن لا يملكن مقاومته أيضا وعلى رأسها العلم مما يضعهن في حرج واضح كما حدث لحنان ترك
حدث هذا في حلقة من برنامج ( خليك بالبيت ) أذيعت بتليفزيون المستقبل منذ عام ونصف تقريباَ. في هذه الحلقة استضافها فيها الإعلامي اللبناني زاهي وهبى .وأرتدت فيها حنان قناع الداعية الإسلامية منذ بداية الحلقة ،وحينما سألها زاهي عن علاقتها حالياً بأهلها أخطأت في الآية الكريمة وقالت ان الله أوصى بالأهل وقال في كتابه "لاتقل لهما أوف ولا نوف"وحينما سارع المشاهدين عبر الفاكس والتليفون بتصحيح الآية(لا تقل لهما أوف ولا تنهرهما) وصبوا لعناتهم وغضبهم على رأسها . فسارعت حنان بالإعتذار مؤكدة أنها لا تقصد أي إساءة.وأن الأمر ليس إلا خطأ غير مقصود.دلالة الواقعة هي تورط حنان في لعب دور ليست جديرة بلعبه . وأنها لم تقتنع بدورها كممثلة صارت تبحث عن دور آخر (دور الداعية) مما أوقعها في الحرج وكشف مأساتها النفسية.
الأكثر صوابا من وجهة نظري أن يقترن حجاب حنان أو أي فنانة بالإعتزال التام والاختفاء عن أغلفة المجلات كما فعلت شادية ، حتى لا تكن مثل الفراشات اللاتي لا تقوين على الابتعاد عن الضوء حتى الاحتراق

12 comments:

Leonardo said...

موافقك على رفض إن الممثّله من دول تبقى عايشه حياتها وبتاع وبعدين لمّا تاخد قرار الحجاب تقلبها مواعظ وإفتاء بدون أى سابق معرفه أو علم
مش الممثلات بس الحقيقه
ده أى حدّ سواء شاب أو فتاة بتلاقيه مثلا صايع وممكن يكون بيحشّش وللا بيضرب بانجو وبعدين فجأه يربّى دقنه ويفتى فى الدين والدنيا وكأنه امتلك الحقيقه المطلقه

بس هاختلف معاك فى نقطة إن مش من حق الممثّله ارتداء الحجاب أو غطاء للرأس مع البقاء فى المهنه على اعتبار إن ده بيخالف الشروط الأساسيه من قابلية تغيير الشكل وتقمّص الشخصيات المختلفه
فى رأيى إن ده مش صحيح
الحجاب فى مصر مش مرتبط بطبقه معيّنه دلوقتى أو كاراكترات معيّنه
منى زكى طلعت محجّبه فى فيلم سهلا الليالى رغم إن المفروض من طبقه هاى نسبيا
وياسمين عبدالعزيز فى صايع بحر بنت من طبقه شعبيه
ومنى عبدالغنى فى مسلسل عيش أيامك طبقه فوق المتوسّطه
يعنى فيه أدوار مناسبه بدون مايبقى شكلها غير ملائم
مش شرط اللى تلبس الحجاب تبقى فى مسلسلات دينيه وخلاص
وكون إن ممثّله تبقى مقتنعه بالحجاب كواجب دينى ومش شايفه إن مهنة التمثيل فى حدّ ذاتها حرام طالما مابيعارضش قناعاتها الدينيه يبقى تمثّل زّى ماهىّ عايزه وأنا كمتفرّج أحكم على العمل الفنى من تمثيل وسيناريو وإخراج

ومع احترامى الشديد لشاديه وبعدها عن الأضواء والصراعات بعد اعتزالها بس مش ده الطريق الوحيد الإجبارى
ومش شرط إن الممثله المحتجبه تبقى زى شاديه وتبعد نهائيا أو زى عفاف شعيب وتهاجم الفن بضراوه وبعدين ترجع تانى
ولا حتى زى شمس البارودى اللى انقلبت داعيه بعد النقاب

ممكن حنان تمشى فى أى سكّه من دول صحيح
بس يفضل حجابها حريّه شخصيه ماأقدرش أحاسبها عليها سواء مثّلت بالحجاب أو اعتزلت نهائيا
أحاسبها بس لما تفتى بدون علم وتعمل نفسها داعيه
ساعتها أقولها إنتى قريتى إيه وللا درستى إيه علشان تدّينا محاضرات فى الدين

Unknown said...

صح عندك حق في كل كلمة
حنلن ترك
حلا شيحة
زيهم زي اى بنت بتشتغل اي حاجة في الدنيا
كانت بشعرها وقررت تلبس الحجاب
ليه بقة بنعملهم تماثيل ونحولهم لداعيات
ماهو في الالاف بيلبسوه كل يوم
والالاف بيقلعوه كل يوم
نفسي نبطل العبط ده

3arousa 7alawa said...

ربنا يكملك بعقلك يا حنان وتبقى الخطوة الجايه إنك تبطلي تمثيل لأن كل بدعه ضلاله زي مانتي هارشه يا أختي
وتبقي ضربتي عصفورين بحجر وتاخدي ثواب إنك بطلتي تعملي أدوار ملهاش قيمه حقيقية
هوه كده يوسف شاهين كل شويه يطرشلنا واحد ملوش لازمه

yara said...

يا استاذ اياكش تولع حنان على حلا على بلا .. مايتحرقو بجاز
يعنى هى السينما المصرية كل سنة بتاخد كان وجت حنان قفلتها
دى الحاجة اللى ينفع يتقال عليها فن بقت بتخرج بالضالين
ماهى بايظة بايظة بلا خيبة

AZ said...

يعنى اذا حنان خيبت املنا واتحجبت وفضلت تمثل انااملى فى احمد السقا كبير انه بامر الله ربنا يهديه و يتحجب ويعتزل

حالة طواريء said...

يسلم تمك

M. El-Hajj said...

أنا موافقك تماماً أنا معنديش أعتراض علي الحجاب بس عندي أعتراض علي التهريج و التهبيل

Unknown said...

هيا جابت نوف دى منين ... يا دى النصيبة

Ahmed Rashwan said...

ليوناردو
الموضوع فيه جانب علمي ولامؤاخذة
يعني حتى لو مثلت بغطاء الرأس مرة فتاة ارستقراطية ومرة طبقة متوسطة وثالثة بنت شعبية ، في النهاية سيكون الأداء في إطار شكلي و موضوعي واحد أي أنتفت فكرة التمثيل
أضف أن وراء التحمس لحجاب الفنانات وتمثيلهم بالحجاب هم المنتجين الخليجيين

جيرنيمو
وأنا كمان نفسي
بس ياريت نفكر مين من مصلحته انتشار هذا العبط واستمراره

عروسة حلاوة
إنشالله تبطل متقلقيش
بس رغم أدوارها الكتير الهايفة إلا أنها كانت خامة لممثلة جيدة ، وآخر أدورها الجيدة في فيلم (أحلى الأوقات)
إيه رأيك ؟

يارا
متبقيش متشائمة قوي يا يارا
فيه مخرج أسمه يسري نصرالله وواحد تاني أسمه أسامة فوزي
وغيرهم من عشرات مخرجي السينما المستقلة
النجوم موضوع تاني ، الموضوع بالنسبة للأغلبية منهم مجرد وسيلة للكسب المادي مش أكتر

AZ
ساعتها نعمل فرح بجد
وأنا حأتوسط له في وظيفة جامدة جدا في موبينيل

رات
تسلميلي يا رات
إيه أخبار الأفلام الجديدةالمعروضة في باريس ؟

زنجي
أنا كمان موافقك ، أصل التهبيل والتهريج بقت عملة الزمن الصعب النهاردة

مويا
مش عارف ، رغم أن الأبيض بقى غالي قوي اليومين دول

شغف said...

اسمحلي أنحني ، وأرفع قباعة رأسي - احم الافتراضية - ليك و ل ليوناردو اعجابا

بصراحة ده أول بوست أشوفه بيتكلم عن موضوع الحجاب / حجاب الممثلات / حنان ترك
بطريقة موضوعية ومحترمة

وكنت داخلة عشان أكتب رأيي ده و أشرح رأيي الخاص في الموضوع ، ولاقيت ليوناردو سبقني ورد
وأحب أتساند معاه وأقول ان المسألة في الاول و الآخر محاولة للاختيار الخاص - يعني لا طريق واحد فحسب لهذا الموضوع -

أنا معاك تماما يا film69
أن من شروط المهنة القدرة على التلون في الاشكال والشخصيات المختلفة
لكن لاحظ ان فيه نسبة كبيرة م الشعب المصري - اللي المفروض الفيلم المصري بيبقى موجه له - محجبات
يا ترى كلهم نمط واحد و شخصيه واحده سواء في الشكل او الشخصية؟

ما يتهيأليش أبدا

أعتقد ان حكاية الحجاب دي تبقى سذاجة في حالة واحدة بس ، وهي الحالة اللي تطلع فيها الممثله المحجبة في اطار دور واحد - مثالي - وبس

لكن الامثلة اللي جات هنا على الممثلات اللي طلعوا بالحجاب في الافلام - على الرغم من كونهم غير محجبات اساسا- كانت أمثلة جيدة للادوار اللي ممكن تنتقيها الممثلة المحجبة دون أن الابتعاد عن معنى التمثيل كتمثيل

وفعلا حنان ترك عندها مقومات جيدة / وبدأت تختار صح في اعمال كتيرة في الفترة الاخيرة

وعلى رأسهم " أحلى الاوقات " و كمان " حب البنات" -اللي جايين على بالي دلوقتي

إبراهيم السيد said...

i agree with u film,

7aga 3ageeba sabo eldeen koloh we merakezeen 3la el7egab

saso said...

الممتع بقي هو قرار عودة المعتزلات للتمثيل في اطار ملائكي فظيع
الست سهير البابلي اللي بابا قومنا من المسرحية بتاعتها - خاف نحفظ كلامها - علشان قلة ادبها والست سهير رمزي معجزة الافلام الهابطة بيدونا دروس في الاخلاق طول المسلسل او الفيلم المنحوس غير اطنان الميك اب علي اعتبار ان الحجاب قطعة زادة علي الملابس وكفي
ربنا هداكي اوك بس مفيش داعي تدينا نصايح وتقوليلنا اشربوا اللبن اقعدي في بيتك واشربية انتي